Mar 1 | NdeIBE | STEP | Ukuqalisa kwevangeli ngoJesu Khristu, indodana kaNkulunkulu.

Mark 1

UJohane Umbhaphathizi Ulungisa Indlela

1 Ukuqalisa kwevangeli ngoJesu Khristu, indodana kaNkulunkulu.

2 Kubhaliwe ku-Isaya umphrofethi ukuthi: “Ngizathuma isigijimi sami phambi kwakho, esizalungisa indlela yakho –

3 ilizwi lalowo omemezayo enkangala, ‘Lungiselani iNkosi indlela, yenzeleni izindledlana eziqondileyo.’ ”

4 Kwasekufika uJohane ebhaphathiza emmangweni wasenkangala etshumayela ukubhaphathiza kokuphenduka ukuze kuthethelelwe izono. 5 Ummango wonke waseJudiya kanye labantu bonke baseJerusalema baphuma beza kuye. Bavuma izono zabo, wababhaphathiza eMfuleni uJodani.

6 UJohane wayevunula izigqoko ezazenziwe ngoboya bekamela, elebhanti lesikhumba ekhalweni lwakhe, esidla izintethe loloju.

7 Intshumayelo yakhe yayisithi: “Ngemva kwami kuzafika omunye ozaba lamandla kulami, omichilo yamanyathela akhe akungilingananga ukuthi ngikhothame ngiyithukulule. 8 Mina ngilibhaphathiza ngamanzi, kodwa yena uzalibhaphathiza ngoMoya oNgcwele.”

Ukubhaphathizwa Lokulingwa kukaJesu

9 Kusona lesosikhathi uJesu weza evela eGalile wabhaphathizwa nguJohane eJodani.

10 UJesu ephuma emanzini wabona izulu livuleka uMoya esehlela phezu kwakhe enjengejuba.

11 Kwafika ilizwi livela ezulwini lathi: “Wena uyiNdodana yami engiyithandayo; ngiyathokoza kakhulu ngawe.”

12 Masinyane uMoya wamthumela enkangala,

13 wahlala khona enkangala izinsuku ezingamatshumi amane elingwa nguSathane. Wayehlala lezinyamazana zeganga, ekhonzwa yizingilosi.

Ukubizwa Kwabafundi Bokuqala

14 UJohane esephoselwe entolongweni uJesu waya eGalile ememezela izindaba ezinhle zikaNkulunkulu. 15 Wathi, “Isikhathi sesifikile. Umbuso kaNkulunkulu ususeduze. Phendukani likholwe izindaba ezinhle!”

16 Kwathi uJesu ehambahamba eceleni koLwandle lwaseGalile wabona uSimoni lomfowabo u-Andreya bephosa inetha echibini ngoba babengabagoli benhlanzi. 17 Wathi kubo, “Wozani lingilandele, ngizalenza abagoli babantu.” 18 Bahle batshiya amanetha abo bamlandela.

19 Wathi esehambile elinye ibanga wabona uJakhobe indodana kaZebedi elomfowabo uJohane besemkhunjini belungisa amanetha abo. 20 Wahle wababiza, batshiya uyise uZebedi emkhunjini kanye lezisebenzi bamlandela.

UJesu Ukhupha Umoya Omubi

21 Baya eKhaphenawume, kwathi sekufike iSabatha uJesu waya esinagogini waqalisa ukufundisa. 22 Abantu bamangaliswa yikufundisa kwakhe ngoba wayefundisa njengomuntu ololwazi, hatshi njengabafundisi bomthetho.

23 Khonokho nje indoda eyayisesinagogini labo eyayiphethwe ngumoya omubi yamemeza yathi, 24 “Ufunani kithi, Jesu waseNazaretha? Ulande ukuzasibhubhisa na? Ngiyakwazi ukuthi ungubani – ungoNgcwele kaNkulunkulu!”

25 “Thula!” kukhwaza uJesu. “Phuma kuye!”

26 Umoya omubi wayidlukuluza ngamandla indoda waphuma kuyo unqongoloza.

27 Abantu bamangala baze babuzana bathi, “Kuyini lokhu? Yikufundisa okutsha – okulokwazi! Futhi ulaya imimoya emibi imlalele.”

28 Izindaba ngaye zamemetheka ngokuphangisa kuwo wonke ummango waseGalile.

UJesu Usilisa Abanengi

29 Bonela ukusuka esinagogeni bahamba loJakhobe loJohane baya emzini kaSimoni lo-Andreya. 30 Uninazala kaSimoni wayelele phansi ephethwe ngumkhuhlane, basebetshela uJesu ngaye. 31 Yikho wasesiya kuye, wambamba ngesandla wamvusa. Umkhuhlane wamtshiya wahle waqalisa ukubadekela ukudla.

32 Ngaleyontambama ilanga selitshonile abantu baletha kuJesu bonke abagulayo labaphethwe ngamadimoni. 33 Idolobho lonke lagcwala emnyango, 34 uJesu wasilisa abanengi ababelezifo ezehlukeneyo. Njalo wakhupha amadimoni amanengi, kodwa kaze awavumela amadimoni ukuthi akhulume ngoba ayemazi ukuthi ungubani.

UJesu Ukhuleka Ekusithekeni

35 Ekuseni kakhulu, kusesempondozankomo, uJesu wavuka waphuma endlini waya endaweni esekusithekeni wayakhuleka. 36 USimoni labakhula bakhe bahamba bayamdinga, 37 bathi sebembonile bathi, “Bonke abantu bayakudinga!”

38 UJesu waphendula wathi, “Kasiyeni kwenye indawo – emizini eseduze – ukuze ngiyotshumayela lakhona. Yikho engikulandileyo.”

39 Kanjalo walibhoda lonke elaseGalile etshumayela emasinagogini abo njalo ekhupha amadimoni.

Indoda Elobulephero

40 Kweza kuye indoda eyayilobulephero yamncenga iguqe phansi ngamadolo yathi, “Aluba uthanda ungangihlambulula.”

41 UJesu eyizwela isihawu welula isandla sakhe wayibamba indoda. Wathi, “Ngiyathanda. Hlanzeka!” 42 Masinyane ubulephero baphela, wasila.

43 UJesu wahle wathi kahambe, wamqonqosela wathi, 44 “Unanzelele ukuthi ungatsheli muntu ngalokhu. Kodwa hamba uziveze kumphristi unikele ngemihlatshelo eyamiswa nguMosi eyokuhlanzeka kwakho kube yibufakazi kubo.” 45 Kodwa wasuka wahle wavula isifuba sakhe wayisakaza indaba. Ngenxa yalokho uJesu wayengabe esangena obala edolobheni kodwa wasehlala ngaphandle ezindaweni ezingelabantu. Loba kunjalo abantu babelokhu bethululeka besiza kuye beqhamuka inxa zonke.